Fleiri enn nakrantíð vilja vera heilsurøktarar.
Nú freistirnar at søkja inn á miðnámsskúlarnar kring landið eru farnar, frættist í miðlunum, at ein skúli skarar framúr í umsóknartali.
Tað er Heilsuskúli Føroya, sum í ár hevur fingið tríggjar ferðir fleiri umsóknir enn í fjør, og flestu av hesum umsøkjarum vilja lesa til heilsurøktara. Rektarin á heilsuskúlanum heldur økta áhugan fyri útbúgvingunum á skúlanum koma av, at tað nú eru útlit til, at lesandi á heilsuskúlanum fara at fáa løn undir útbúgving.
Í Heilsurøktarafelagnum fegnast vit um, at heilsurøktaraútbúgvingin hevur fingið undanvind, og vit eru ikki ósamd í, at lógaruppskotið kann vera ein orsøk til vaksandi áhugan. Men vit eru sannførd um, at tað eru fleiri góðar orsakir til at velja at útbúgva seg til heilsurøktara, tí heilsurøktaraútbúgving er ein breið heilsufaklig útbúgving.
Sum heilsurøktari kann ein starvast í øllum teimum ymisku geirunum í heilsu- og umsorganarøkinum, um tað so snýr seg um sjúkrahúsdeildir, ellis- og røktarheim, heimatænstu ella stovnar fyri fólk við sálarsjúku, heilaskaða ella menningartarni, so hóska fakligu kompetansurnar hjá heilsurøktarum til øll hesi økini og fleiri við.
Í dag hevur nevndin í Heilsurøktarafelagnum verið til hoyringar í Mentanarnevndini í Løgtinginum og givið broytingaruppskotinum um løn undir útbúgving síni bestu viðmæli. Vit vóna tað besta og ynskja teimum 20, sum byrja at lesa til heilsurøktara í vár, bestu eydnu við útbúgvingini!
Bingerð H. Fosságil, forkvinna í Heilsurøktarafelagnum